कैलाली – सुदूरपश्चिम प्रदेश प्रमुख नजिर मियाँले श्रीकृष्ण जन्माष्टमी पर्वले समाजलाई भावनात्मक एकताको सूत्रमा आबद्ध गरी धार्मिक सहिष्णुता तथा आपसी सद्भाव कायम गर्दै सत्कर्मका लागि प्रेरित गर्न सहयोग पु¥याउने बताएका छन् ।
आज बिहान अत्तरियामा रहेको ब्रम्हा कुमारी विश्व विद्यालयले श्रीकृष्ण जन्माष्टमीको अवसरमा शुभकामना आदान प्रदान गर्न आयोजना गरेको कार्यक्रममा प्रदेश प्रमुख मियाँले यस्तो बताएका हुन् ।
उनले यस पर्वले सम्पूर्ण नेपालीमा आपसी सद्भाव, करुणा र मैत्री भावना अभिवृद्धि गर्दै सभ्य र सुसंस्कृत समाज निर्माण गर्न प्रेरणा प्रदान गर्ने भन्दै मौलिक परम्पराको संरक्षण गर्नुपर्नेमा समेत जोड दिएका छन् ।
आज विश्वभर हिन्दु धर्मावलम्बीहरूले भक्तियोग, ज्ञानयोग र कर्मयोगका प्रणेता भगवान् श्रीकृष्णको पूजा–अर्चना गरी श्रद्धा भक्तिपूर्वक धूमधामका साथ यो पर्व मनाउने गर्दछन् ।
द्वापर युगमा दुर्जनको विनाश र सज्जनको रक्षा गर्नका लागि वासुदेव र देवकीको आठौँ सन्तानका रूपमा भाद्र कृष्ण अष्टमीको मध्यरातमा श्रीकृष्णको जन्म भएको धार्मिक विश्वास रहिआएको छ । सोही दिनको सम्झनामा हिन्दु धर्मावलम्बीहरूले हरेक वर्ष श्रीकृष्ण जन्माष्टमी पर्व मनाउने गर्दछन् ।
