काठमाडौँ – देशभरका सामुदायिक रेडियोको छाता सङ्गठन अकोराब सुदुरपश्चिमको अध्यक्षमा बेदप्रकाश तिमल्सिना चयन भएका छन् । यहि २८ गतेदेखि ललितपुरमा चलिरहेको १८औँ वार्षिक साधारण सभा तथा ८औं अधिवेशनबाट सुदुरपश्चिमको अध्यक्षमा तिमल्सिना चयन भएका हुन् ।
अध्यक्षका लागी तिमल्सिना लगायत अनिल बहादुर शाही, राम खत्रीले उम्मेदवारी दर्ता गरेका थिए । सहमतिका आधारमा तिमल्सिना अध्यक्षमा चयन भएका हुन् । रेडियो रामारोशन अछामका तिमल्सिना र रेडियो सुदूर आवाज डडेल्धुराका खत्रीले प्रेस युनियनबाट उम्मेदवारी दिएका थिए भने रेडियो बुढीनन्दा बाजुराका शाही समाजवादी प्रेस संगठनबाट उम्मेदवार बनेका थिए ।
यस्तै अन्य पदमा पदाधिकारी निर्विरोध चयन भएका छन् । उपाध्यक्ष महिलामा रेडियो बाजुरा,बाजुराकी प्रतिक्षा थापा, सचिवमा रेडियो सेवेन स्टार बैतडीका अम्मरराज भट्टराई र कोषाध्यक्षमा रेडियो शैलेश्वरी डोटिका बिक्रम बहादुर खडका चयन भएका छन् ।
यस्तै सदस्यहरुमा रेडियो अत्तरियाका धुर्ब राज ओझा र रेडियो मेलौली बैतडीका लक्ष्मण विसि निर्विरोध चयन भएका छन भने महिला सदस्यमा उम्मेदवारी नै नपरेको निर्वाचन समितिले जनाएको छ ।
यसैगरी लेखा समिति संयोजकमा सागर ताम्राकार चयन भएका छन् । लेखा समिति संयोजकमा आफ्नो एफएम डडेल्धुराका ताम्राकार र रेडियो गाउँघर अछामका कृष्ण बहादुर बुढाले उम्मेदवारी दर्ता गरेका थिए । सहमतिका आधारमा ताम्राकार लेखा समिति संयोजकमा चयन भएका छन् ।
प्रदेशमा अध्यक्ष १ जना, उपाध्यक्ष महिला १ जना, सचिव १ जना, कोषाध्यक्ष १ जना, सदस्य महिला १ जना, सदस्य खुल्ला २ जना, लेखा समिति संयोजक १ जना र लेखा समिति सदस्य १ जना गरी १० पदाधिकारीका लागि ९ जनाको उम्मेदवारी परेको थियो ।
अध्यक्षमा ३ जना र लेखा समिति संयोजकमा २ जनाको उम्मेदवारी परेको थियो भने उपाध्यक्ष, सचिव, कोषाध्यक्षमा १/१,सदस्यमा २ जना र लेखा समिति संयोजकमा २ जनाको उम्मेदवारी दर्ता भएको थियो भने सदस्य महिला र लेखा समिति सदस्यमा उम्मेदवारी नै परेको थिएन् ।
