
अत्तरिया – कैलालीको अत्तरियामा रक्तदान कार्यक्रमको आयोजना गरिरहेको छ । प्रदेश युवा परिषद् सुदूरपश्चिम प्रदेशको प्रायोजनमा सुदूरपश्चिम सामुदायिक अस्पताल अत्तरियाले रक्तदान कार्यक्रमको आयोजना गरेको हो । रक्तदान कार्यक्रम अहिले सुदूरपश्चिम सामुदायिक अस्पतालको प्राङ्गणमा जारी रहेको अस्पतालका अध्यक्ष आनन्द भट्टले बताएका छन ।
उनले आफूले पनि कार्यक्रममा १९ औं पटक रक्तदान गरेको बताए । ‘अहिले बिरामीको चाप बढ्ने समय भएपनि कैलालीको ब्लड बैंकमा रगतको अभाव भएका कारणले रक्तदान कार्यक्रमको आयोजना गरेका हौ’ उनले भने ‘रक्तदानको लागि सबैलाई रगत दिन आह्वान पनि गर्दछु ।’

उक्त अभियानमा रगत दान गरेका धर्म सिह कुवरले रक्त दान गर्ने अवसरका लागि आयोजन र प्रायोजकलाई धन्यावाद ज्ञापन गरे । उनले रगतको अभावमा कसैको ज्यान नजाओस भन्ने उद्देश्यले रक्तदान गरेको बताए ।
स्थानीय कुवेर खड्काले रगत दान नै जिवन दान भएकाले यसमा सबैले सहभागिता हुनुपर्ने बताए । ‘मैले यो भन्दा पहिले २४ पटक रक्तदान गरिसकेको छु’ उनले भने ‘रक्तदान नै जिवन दान हो ।’


















