अत्तरिया – कैलालीको अत्तरिया उद्योग वाणिज्य संघका अध्यक्ष कल्याणसिंह बोहरालाई विधानबमोजिम सदस्य मनोनीत गर्न सुझाव दिइएको छ ।
सिमितिका ११ जनाले सामूहिक राजीनामा दिएपछि अध्यक्ष बोहराले आज सल्लाहकारहरुसंग छलफल कार्यक्रम राखेका थिए ।
छलफलमा उपस्थित सल्लाहकारहरुले संघलाई गतिदिन विधानबमोजिम सदस्य मनोनीत गर्न सुझाव दिएका हुन् । संघका संस्थापक उपाध्यक्ष एवम् संघका सल्लाहकार नैनसिंह कार्कीले राजीनामा विकल्प नभएको बताउँदै संस्थालाई अघि बढाउन कार्यसमिति आवस्यक रहेको बताए ।
राजीनामा दिने पदाधिकारीहरुले व्यवसायीसंग छलफल नगरी आफुखुसी राजीनामा गरेर राम्रो नगरेको बताए । त्यस्तै संघ सल्लाहकार धर्मसिंह कुवरले पनि विधानबमोजिम अघि बढ्न सुझाव दिए ।
अर्का सल्लाहकार तेज खड्काले प्रादेशिक महोत्सव अत्तरियाको पहिचान भएकोले चाँडो मनोनयन गरि महोत्सवको तयारी गर्नुपर्ने बताए । त्यस्तै धनादेवि चोखालले पनि विधानबमोजिम अघि बढ्ने बताइन् ।
संघको विधान २०७१ को परिच्छेद ४ को दफा ५ बमोजिम अध्यक्षले रिक्त पदमा सदस्य मनोनीत गर्न पाउने व्यवस्था छ । छलफलमा बोल्नेहरुले विधानमबोजिम अगाडि बढ्न अध्यक्षलाई आग्रह गरेका छन् ।
