बैतडी – आफ्नै घरमा भरुवा बन्दुक पड्किँदा घाइते भएका बैतडीको सुर्नया गाउँपालिका वडा नम्बर २ का वडा सदस्य दान बहादुर ऐरीको मृत्यु भएको छ।
उपचारका क्रममा धनगढीमा शुक्रबार उनको निधन भएको हो। बुधबार राति घरमा आफैँले भरेको बन्दुक चलाउने क्रममा छर्रा लागेर ४५ वर्षीय ऐरी गम्भीर घाइते भएका थिए।
उनलाई सोही राति जिल्ला अस्पताल बैतडी पुर्याइएको थियो। त्यहाँ उपचार सम्भव नभएपछि थप उपचारका लागि उनलाई धनगढी ल्याइएको थियो।
घटनाको सुरुमा परिवारले ग्यास सिलिण्डर पड्किएर ऐरी घाइते भएको बताएका थिए। तर, प्रहरीको अनुसन्धान र सोधपुछका क्रममा भरुवा बन्दुक पड्किएर उनलाई गोली लागेको खुलेको जिल्ला प्रहरी कार्यालय बैतडीका प्रवक्ता एवं प्रहरी निरीक्षक बलदेब बडुले जानकारी दिए।
प्रहरीले घटनामा प्रयोग भएको भरुवा बन्दुक नियन्त्रणमा लिइसकेको छ। घटनाका बारेमा थप अनुसन्धान भइरहेको प्रहरीले जनाएको छ।
