काठमाडौँ – मुटु स्वस्थ रहेमा मात्र मानिस लामो समयसम्म बाँच्न सक्छ । तर, आजको भागदौडपूर्ण जीवनशैलीमा हामीले आफ्नो समग्र स्वास्थ्यका साथै मुटुको स्वास्थ्यलाई समेत बेवास्ता गरिरहेका छौँ ।
गलत खानपान, मानसिक तनाव, अपर्याप्त निद्रा र व्यायामको अभावका कारण कम उमेरमै मानिसहरूमा मुटुसम्बन्धी समस्या देखिन थालेको छ । आजको यस लेखमा हामी मुटुलाई स्वस्थ राख्न मद्दत गर्ने ५ उपयोगी खानेकुराबारे चर्चा गर्नेछौँ ।
१. ओट्स
ओट्सलाई आफ्नो दैनिक आहारमा समावेश गर्नुहोस् । धेरैलाई ओट्सको स्वाद मन नपर्न सक्छ, तर मुटुको स्वास्थ्यका लागि यो अत्यन्तै फाइदाजनक हुन्छ । ओट्स खानुका साथै प्रशोधित खाना, तेलमा भुटेका परिकार, ट्रान्स फ्याट तथा अत्यधिक नुन र चिनीको सेवन घटाउनुपर्छ । यस्तो खानपानले मुटुरोगको जोखिम कम गर्न मद्दत गर्छ ।
२. ओखर
ओखर मुटुका लागि निकै लाभदायक मानिन्छ । यदि मुटुको कार्यक्षमता कमजोर हुँदै गएको छ भने दैनिक ओखर सेवन गर्नु राम्रो हुन्छ । यसले मुटुलाई दीर्घकालसम्म स्वस्थ र सक्रिय राख्न मद्दत गर्छ ।
३. आलस
आलस मुटुका साथै छाला र पाचन प्रणाली (पेट) को लागि पनि उत्तिकै उपयोगी मानिन्छ । आलसलाई भुटेर त्यसै वा पिसेर धूलो बनाई दैनिक दुई चम्चा मनतातो पानीमा मिसाएर सेवन गर्न सकिन्छ ।
४. हरियो पातदार तरकारी
दैनिक भोजनमा हरियो पातदार तरकारी समावेश गर्नाले मुटुका साथै सम्पूर्ण शरीरलाई स्वस्थ राख्न मद्दत पुग्छ । यसका लागि पालुङ्गो, सलगम वा कर्कलाको पातजस्ता सागसब्जी उपयुक्त हुन्छन् । यिनलाई तरकारी वा सुपका रूपमा पकाएर खान सकिन्छ ।
५. दाल तथा गेडागुडी
आहारमा भटमास तथा विभिन्न थरीका दालहरू समावेश गर्नुपर्छ । यस्ता गेडागुडीले शरीरमा कोलेस्ट्रोलको मात्रा घटाउन, मुटुको कार्यक्षमता बढाउन र मुटुसम्बन्धी विभिन्न रोगबाट जोगाउन मद्दत गर्छन् ।
ध्यान दिनुपर्ने थप कुरा:
मुटुलाई स्वस्थ र बलियो राख्न सही खानपानका साथै दैनिक कम्तीमा ३० मिनेट शारीरिक व्यायाम गर्नु पनि उत्तिकै आवश्यक छ । छिटो–छिटो हिँड्ने, साइकल चलाउने, दौडिने वा योग गर्नाले शरीरमा रक्तसञ्चार सुधार हुन्छ र रक्तचाप तथा कोलेस्ट्रोल नियन्त्रणमा रहन्छ ।
(अस्वीकरणः यो सामग्री सामान्य जानकारीका लागि मात्र तयार पारिएको हो । स्वास्थ्यसम्बन्धी कुनै पनि विशेष सल्लाह वा उपचारका लागि सधैँ सम्बन्धित चिकित्सक वा विशेषज्ञसँग परामर्श लिनुहोस् ।)
