कैलाली – कैलालीको धनगढीमा भारतीय नम्बर प्लेटको कारले मोटरसाइकललाई ठक्कर दिँदा एक जनाको मृत्यु भएको छ । दुर्घटनामा मोटरसाइकलको पछाडि सवार बैतडीका ४८ वर्षीय पदम चन्दको ज्यान गएको हो ।
दुर्घटना गराएपछि फरार भएका भारतीय नागरिक चालक अश्वनी कुमार सिंहलाई प्रहरीले कारसहित पक्राउ गरेको छ । कैलाली । कैलालीको धनगढी उपमहानगरपालिका ३ बोराडाँडी चोकमा भारतीय नम्बर प्लेटको कारले मोटरसाइकललाई ठक्कर दिँदा एक जनाको मृत्यु भएको छ ।
दुर्घटनामा मोटरसाइकलको पछाडि सवार बैतडीको सिगास गाउँपालिका १ गजकोट निवासी ४८ वर्षीय पदम चन्दको ज्यान गएको हो ।
धनगढी चौराहाबाट अत्तरियातर्फ जाँदै गरेको से ४ प ९५२ नम्बरको मोटरसाइकललाई यूपी६५ईएक्स ०१०० नम्बरको भारतीय कारले ठक्कर दिएको थियो ।
कारको ठक्करबाट गम्भीर घाइते भएका चन्दलाई तत्काल उपचारका लागि धनगढीस्थित मायामेट्रो अस्पताल लगिएको थियो । उनको उपचारकै क्रममा अस्पतालमा मृत्यु भएको प्रहरीले जनाएको छ ।
दुर्घटनामा परेर घाइते भएका मोटरसाइकल चालक गौतम ऐरको भने धनगढीकै सीपी अस्पतालमा उपचार भइरहेको छ । उनको अवस्था अहिले सामान्य रहेको बताइएको छ ।
दुर्घटना गराएलगत्तै कारसहित फरार भएका चालकलाई प्रहरीले पक्रेको छ । भारतको उत्तर प्रदेश, वाराणसी बस्ने ४२ वर्षीय अश्वनी कुमार सिंहलाई कारसहित कैलालीको गोदावरी नगरपालिका ६ लालपुरबाट नियन्त्रणमा लिइएको हो ।
पक्राउ परेका चालकमाथि हिरासतमा राखेर घटनाबारे थप अनुसन्धान अगाडि बढाइएको प्रहरीले उल्लेख गरेको छ ।
