धनगढी – कैलालीको गेटा आँखा अस्पताल अगाडी सिटी बजाएर प्रदर्शन गरिएको छ । गेटा आँखा अस्पतालको बेथिति विरुद्ध गठन गरिएको सङ्घर्ष समितिले बुधवार सिटी बजाएर आँखा अस्पतालको गेट अगाडी प्रदर्शन गरेको हो ।
सङ्घर्ष समितिका संयोजक गणेश राज विष्टले आफूहरूले १९ गते देखी चरणबद्ध रूपमा आन्दोलन गर्दै आइरहेको बताए । उनले आन्दोलनको सुरुवात आफूहरूले नभई गेटा आँखा अस्पतालकै प्रशासन र कर्मचारीहरूको विवादका कारण सृजना भएको बताए । उनले आँखा अस्पतालमा विभिन्न समस्याहरू रहेको र त्यसको समाधान नभएसम्म सङ्घर्ष समिति आन्दोलनरत रहने बताए ।
सङ्घर्ष समितिका उपसंयोजक रामचन्द्र भट्टले आँखा अस्पतालभित्र भएका बेथिति, बेसङ्गति र मनोमानी ढङ्गको कार्यशैलीका विरुद्ध स्थानियबासी जागरूक भएको बताए । उनले आफूहरूको उद्देश्य अस्पताल बन्द गरेर आन्दोलन गर्नु नभई सेवाग्राहीहरूको सेवामा मर्का नपर्ने किसिमले सरोकारवाला निकायको ध्यानाकर्षण गराउनु रहेको बताए ।
उनले आँखा अस्पतालको व्यवस्थापन राम्रो भई सेवाग्राहीलाई सहज रूपमा गुणस्तरीय सेवा प्रदान होस भन्ने उद्देश्यले नै आन्दोलन गरिरहेको बताए । उनले गेटा आँखा अस्पतालकै कारण अन्य विभिन्न स्थानका आँखा अस्पतालहरू पनि सञ्चालन भइरहेको बताए । उनले त्यति मात्रै नभई गेटा आँखा अस्पतालले तमाम केन्द्रीय पदाधिकारीहरूको परिवार पालिरहेको समेत आरोप लगाए । उनले स्थानीय बासिन्दाहरूको प्रत्यक्ष सहभागिता हुने गरी नेत्र ज्योति सङ्घको आजीवन सदस्यता उपलब्ध हुने पर्ने बताए ।
सङ्घर्ष समितिका सचिव भरत खड्काले विगत १९ गते देखी सुरु भएको आन्दोलनमा बुधवार सिटी बजाएर विरोध प्रदर्शन गरेको बताए । उनले आफूहरूका मागहरूको सुनुवाई होस र व्यवस्थापन समिति र सरोकारवाला निकायहरूको ध्यान पुगोस् भनेर सिटी बजाएर प्रदर्शन गरिएको बताए ।
स्थानीय सिद्ध राज भट्टले जुनसुकै कुरा पनि केन्द्र बाटै निर्णय हुने गरेका कारण समस्या सृजना भइरहेको बताए । उनले स्थानीयहरूको सहभागिता नै नभएको अवस्था भएका कारण अहिले आँखा अस्पतालमा बेथिति मौलाई रहेको बताए । उनले अस्पताल भित्रको बेथिति अन्त्य हुनुपर्ने र स्थानीयले सहज रूपमा गुणस्तरीय स्वास्थ्य सेवा पाउनुपर्ने माग गरे ।
यही जेठ १९ गते देखी आन्दोलनरत सङ्घर्ष समितिले मङ्गलवार शंख फुकेर प्रदर्शन गरेको थियो । प्रदर्शनमा सङ्घर्ष समितिका पदाधिकारी सहित स्थानीयहरूको सहभागिता रहेको थियो । कालो पट्टी बाँधेर आन्दोलनलाई अगाडी बढाईरहेको सङ्घर्ष समितिले आफूहरूका माग पुरा नभए अझै सशक्त आन्दोलन गर्ने चेतावनी दिएको छ ।
