अत्तरिया – डोटीमा जीप दुर्घटनामा परी २ जनाको मृत्यु भएको छ । जिल्लाको केआई गाउँपालिका – १ लोलीमा सुप. प्र. ०१२३००१ च ३३२९ नम्बरको जीप दुर्घटना भएको हो ।
दुर्घटनामा जीप चालक केआईसिंह गाउँपालिका – १ डुम्राकोटका ३६ वर्षीय गोविन्द शाही र सोही गाउँपालिकाको वडा नम्बर २ जारीमभाडीका ४१ वर्षीय धन बहादुर तिरूवाको घटना स्थलमै मृत्यु भएको प्रहरीले जनाएको छ । दुर्घटनामा थप ६ जना घाइते भएका जिल्ला प्रहरी कार्यालय डोटीले जनाएको छ ।
घाइते हुनेहरुमा केआइसिंह गाउँपालिका – १ डुम्राकोटका २७ वर्षीय तेज तिरूवा, सोही ठाउँकी २६ वर्षीया राधा तिरुवा गम्भीर घाइते भएको प्रहरीले जनाएको छ ।
त्यस्तै डुम्राकोटकै ४ वर्षीय बालक समीर तिरुवा, २३ वर्षीया लक्ष्मी तिरुवा, १९ वर्षीय मीन लुहार र वडा नम्बर २ जारिमभाडीका २४ वर्षीय सुरज तिरुवा सामान्य घाइते भएका छन् । सामान्य घाइतेहरुलाई उद्दार पछि घर पठाइएको छ भने गम्भीर घाइतेहरुको राजपुर स्थित सुजङ अस्पतालमा उपचार भइरहेको छ ।
जीपमा सवार यात्रुहरु शुक्रबार मात्रै भारतबाट आएका थिए । गाडी रिजर्व गरेर दिपायलबाट केआइसिंह जाँदै गर्दा जीप दुर्घटना भएको हो । शुक्रबार राति ११ : ३० बजे जीप दुर्घटना भएको प्रहरीले जनाएको छ ।
